Sports

တိုင်လီမန်းစ်ရဲ့ သွင်းဂိုး မတိုင်မီ လက်ထိဘော ဖြစ်ခဲ့ပေမယ့် VAR မှ ပယ်ဖျက်ခဲ့တဲ့ အပေါ် မှတ်ချက်ပေးလိုက်တဲ့ တူချယ်

မနေ့ည က ကစားခဲ့တဲ့ အက်ဖ်အေ ဖလား ဗိုလ်လုပွဲမှာ ချဲလ်ဆီး အသင်း ဟာ လက်စတာ အသင်း ကို ၀ – ၁ ရလဒ်နဲ့ အရေးနိမ့်ခဲ့လို့ ၊ နည်းပြသစ် သောမတ် တူခယ် လက်ထက် ပထမဆုံး ဆုဖလား ရရှိမယ့် အခွင့်အရေး တခုကို လက်လွှတ်ခဲ့ရပြီ ဖြစ်ပါတယ် ။

 

ဒီပွဲမှာ VAR ရဲ့ ဆုံးဖြတ်ချက် ၂ကြိမ်က အဓိက အလှည့်အပြောင်း ဖြစ်စေခဲ့တယ်လို့ ပြောရင် မမှားနိုင်ပါဘူး ။ လက်စတာရဲ့ တလုံးတည်းသော အနိုင်ဂိုး ဖြစ်တဲ့ ကွင်းလယ်လူ ယူရီ တိုင်လီမန်းစ်ရဲ့ သွင်းဂိုး တည်ဆောက်ခဲ့ရာမှာ အယိုဇီ ပီရက်ဇ် လက်ထိခဲ့ပေမယ့် VAR က ဂိုးပေးခဲ့ပါတယ် ။

ချဲလ်ဆီး အသင်းကတော့ ပွဲပြီးခါနီး မိနစ်ပိုင်း အလိုမှာ ဝက်စ်မော်ဂန် ရဲ့ OG ကနေ ချေပဂိုး ပြန်ရခဲ့ပေမယ့် ၊ ဒီနေရာမှာ VAR က လူစားဝင် နောက်ခံလူ ဘန်ချေဝဲလ် မဖြစ်စလောက် လူကျွံတယ်ဆိုပြီး အကြိမ်ကြိမ် ဆန်းစစ်ကာ ဂိုးအဖြစ် သတ်မှတ်ပေးခဲ့ခြင်း မရှိခဲ့ပါဘူး ။

ဒီရလဒ်ကြောင့် ချဲလ်ဆီး အသင်းဟာ နောက်ဆုံး ကစားခဲ့တဲ့ အက်ဖ်အေ ဖလား ဗိုလ်လုပွဲ ၄ကြိမ်မှာ ၃ကြိမ် အထိ ရှုံးနိမ့်ခဲ့ပြီ ဖြစ်သလို ၊ ဒါဟာ ဒီရာသီ အသင်းရဲ့ လက်ကျန် ၃ပွဲ အပေါ် ဘာတွေ သက်ရောက်မှု ဖြစ်နိုင်မလဲ ဆိုတာ ဆက်လက် စောင့်ကြည့်ရမှာ ဖြစ်ပါတယ် ။

ချဲလ်ဆီး နည်းပြ သောမတ်စ် တူချယ် ကတော့ လက်စတာ ရဲ့ တလုံးတည်းသော အနိုင်ဂိုး handball ဖြစ်နိုင်ခြေ ရှိခဲ့တဲ့အပေါ် ” ကျွန်တော် မတွေ့ခဲ့ပါဘူး ။ ကျွန်တော့ရဲ့ လက်ထောက် တွေကတော့ ဗီဒီယို အနှေးပြကွက်တွေမှာ ဒီ မြင်ကွင်းကို သေသေချာချာ တွေ့ခဲ့ပါတယ် ။ ကစားသမားတွေကလည်း ဒါဟာ လက်ထိဘော ဖြစ်တယ်လို့ ပြောခဲ့ပါတယ် ။ ”

” အာဆင်နယ် နဲ့ ပွဲမှာလည်း လက်ထိဘော တကြိမ် ဖြစ်ခဲ့ပေမယ့် VAR က ကြားဝင် စွက်ဖက်ခဲ့ခြင်း မရှိခဲ့ပါဘူး ။ ဒီနေ့ပွဲရဲ့ တလုံးတည်းသော သွင်းဂိုးမှာလည်း VAR ရဲ့ ဆုံးဖြတ်ချက်က အရမ်း အဆုံးအဖြတ် ပေးခဲ့ပါတယ် ။ ”

” အာဆင်နယ် ဟာ VAR ကြောင့် ကျွန်တော်တို့ဖက်ကို ဂိုးပြန်ပေးရမယ့် အခိုက်အတန့်နဲ့ ရှောင်လွှဲနိုင်ခဲ့သလို ၊ ဒီနေ့ပွဲမှာလည်း VAR ကြောင့် လက်စတာ ဟာ တလုံးတည်းသော သွင်းဂိုးကို ရခဲ့ပါတယ် ။ ကျွန်တော် ဟာ ဒီ လက်ထိဘောတွေနဲ့ ပတ်သက်ပြီး ဘယ်လို နားလည်လို့ နားလည်ရမှန်း မသိတော့ပါဘူး ။ ”

” ဒီတော့ ခင်ဗျား ဟာ ဒီလို ဆုံးဖြတ်ချက် အခိုက်အတန့် တွေမှာ ကံအနည်းငယ် ကောင်းဖို့ လိုအပ်တယ်လို့ ထင်ပါတယ် ။ ဒီနေ့ပွဲမှာတော့ လက်ထိဘော ဖြစ်နိုင်ခြေ အခိုက်အတန့်ကို ကျွန်တော် မမြင်ခဲ့ပါဘူး ။ ဒီတော့ ကျွန်တော် ဘာမှတ်ချက်မှ ထပ်မပေးနိုင်တော့ပါဘူး ။ ”

” ဘယ်လိုပဲဖြစ်ဖြစ် ဒီ အဖြစ်အပျက် အပေါ် ကျွန်တော့ရဲ့ အမြင်ကလည်း ဘာမှ မသက်ဆိုင်တော့လို့ ပြောလည်း ထူးမှာ မဟုတ်ပါဘူး ။ ဘာလို့လဲ ဆိုတော့ သူတို့ ဘယ်လို အခြေအနေ ဘယ်လို အချိန်အခါမှာ ပြစ်ဒဏ် ချမှတ်မလဲ ဆိုတာ ၊ ဘယ်အချိန်မှာတော့ ဘောလုံးနဲ့ လက်နဲ့ ထိပေမယ့် ကစားခွင့် ဆက်ပေးတာကို ကျွန်တော်လည်း မသိနိုင်တော့လို့ပါ ။ ” လို့ ပြောကြားခဲ့ပါတယ် ။

SPORTS MYANMAR