Celebrity

အဆိုတော်ရေမွန် ငှက်ဖျားရောဂါဖြင့်ကွယ်လွန်

ရော့ခ်ဂီတအဆိုတော် တဦးဖြစ်သည့် ရေမွန်သည် ယနေ့ (ဇွန် ၂၃ ရက်) နံနက်ပိုင်းတွင် ငှက်ဖျားရောဂါဖြင့် ဆုံးပါးသွားကြောင်း အနုပညာအသိုင်းအဝိုင်းမှ သိရသည်။

အသက် ၃၂ နှစ်အရွယ် အဆိုတော် ရေမွန်သည် ငှက်ဖျားရောဂါပိုး ဦးနှောက်ထဲ ဝင်သွားခြင်းကြောင့် ဆုံးပါးသွားခြင်းဖြစ်ကြောင်း အနုပညာအသိုင်းအဝိုင်းက အတည်ပြုပြောဆိုသည်။

တွတ်ပီဟု ချစ်စနိုးခေါ်ကြသည့် အဆိုတော်ရေမွန်၏ သေဆုံးမှုကို ညီမဖြစ်သူက “ အော် ဘပီရယ် နားလည်ပေးကြပါ။ ဖုန်းတွေမဆက်ကြပါနဲ့ဦး ပြန်ဖြေဖို့အားမရှိလို့ပါ။ တောင်းပန်ပါတယ်” ဟု ၎င်း၏ လူမှုကွန်ရက်စာမျက်နှာတွင် ရေးသားထားသည်။

ဂီတအသိုင်းအဝိုင်းမှ ၎င်း၏သူငယ်ချင်းဖြစ်သူ အဆိုတော်နိုဗန်ထူးကလည်း ရေမွန်၏ သေဆုံးမှုကို အတည်ပြုထားသည်။

Idiots Band ၏ ပင်တိုင်အဆိုတော် တဦးဖြစ်သည့် ရေမွန်၏ သတင်းနှင့် ပတ်သက်၍ Idiots ၏ လူမှုကွန်ရက်စာမျက်နှာတွင်လည်း “မျှော်လင့်မထားတဲ့ သတင်းဆိုးတခုကို ကျနော်တို့ ကြုံလိုက်ရပြီဗျာ။ ကျနော်တို့ရဲ့ Raymond ဘဝတပါးသို့ ကူးပြောင်းသွားပါပြီ။ စိတ်ထားကောင်းတဲ့ Raymond ကောင်းမွန်တဲ့ဘုံဘဝ ရောက်မှာပါ။ သူငယ်ချင်း Rest In Power Brother” ဟု ရေးသားထားသည်။

#WhatsHappeningInMyanmar
#RejectMilitaryCoup