Local News

မြင်းခြံမှာ ၁၃ ယောက်ထက်မနည်း ဖမ်းခံရ 

စစ်ကောင်စီက ဖမ်းဆီးထားသူ ရာနဲ့ချီကို ဗုဒ္ဓဟူးနေ့က ပြန်လွှတ်ပေးခဲ့သလို ဖမ်းဆီးမှုတွေကိုလည်း ဆက်လုပ်နေပါတယ်။ မန္တလေးတိုင်း မြင်းခြံမြို့မှာ ဗုဒ္ဓဟူးနေ့ညမှာပဲ ၁၃ ဦးထက်မနည်း ဖမ်းဆီးခံရပါတယ်။ ရပ်ရွာအရေး တက်တက်ကြွကြွလုပ်သူတွေ ဖမ်းဆီးခံရတာလို့ ဒေသခံတွေက ပြောပါတယ်။ ဒီအကြောင်း ရန်ကုန်ကလာတဲ့သတင်းကို ကိုဇော်၀င်းလှိုင်က ပြောပြပေးပါမယ်။

မန္တလေးတိုင်း မြင်းခြံမြို့နယ်ထဲက ဒေသခံ ၁၃ ယောက်ထက်မနည်း ဇွန် ၃၀ ရက်ညပိုင်းမှာ ဖမ်းဆီးခံခဲ့ရပါတယ်။ စစ်အာဏာသိမ်းပြီးနောက် ဖမ်းဆီးခံခဲ့ရသူ ရာနဲ့ချီကို အကျဉ်းထောင်တချို့ကနေ စစ်ကောင်စီက ပြန်လွှတ်ပေးခဲ့တဲ့ နေ့မှာပဲ ခုလို ထပ်မံဖမ်းဆီးခံရသူတွေ ရှိခဲ့တာပါ။ မြင်းခြံမှာ ဖမ်းဆီးခံရသူတွေဟာ ရပ်ရွာအရေးလုပ်ကြသူတွေများတယ်လို့ မြင်းခြံလူထု လှုပ်ရှားမှုကော်မတီက ပြောပါတယ်။

“မနေ့ညမှာ ၁၀ နာရီထိုးပြီးလောက်မှာ စပြီးဖမ်းတာပေါ့။ အမှတ် ၄ ရပ်ကွက်မှာဆို ၆ ယောက် အဖမ်းခံရတယ်။ အမှတ် ၁၈ ရပ်ကွက်မှာ ၄ ယောက် အဖမ်းခံရတယ်။ ကျွန်တော်တို့ အမှတ် ၆ ရက်ကွက်မှာတော့ အနည်းဆုံး ၃ ယောက် အဖမ်းခံရတယ်။ အဖမ်းခံရတဲ့သူတွေ အားလုံးကတော့ နိုင်ငံရေး တော်လှန်ရေးမှာထက်စာလို့ရှိရင် ရပ်ရေးရွာရေးမှာပဲ တက်တက်ကြွကြွ ပိုလုပ်တဲ့သူတွေပဲဗျ ဒီတခါဖမ်းတာကတော့ ပြည်သူကို ပစ်မှတ်ပြု ဖမ်းတဲ့ ပုံစံမျိုးတောင်ထင်တယ်။ အကျဉ်းသားတွေကို လွှတ်ပေးတယ်။ ညကြီးမှာ တမြို့လုံးနီးပါး ဖမ်းတယ်ဆိုတော့ သူတို့ရဲ့ ရိုးသားတဲ့ စိတ်တော့ မဟုတ်ဘူးခင်ဗျ။”

ဗုဒ္ဓဟူးနေ့ ညဖက်က စစ်တပ်ကလာရောက်ဖမ်းဆီးခဲ့တာကို မျက်မြင်တွေ့ရှိသူ တဦးကလည်း အခုလိုပြောပါတယ်။

“သူတို့ကားက ၃ ၊၄ စီးလောက်တော့ရှိတယ်။ ကျွန်တော်တို့ကလည်း အပြင်ကိုထွက်ပီးမကြည့်ရဲတော့ ဒီတိုင်းပဲ အိမ်ထဲကနေကြည့်ရတယ်။ သူတို့က အပြင်ကနေပြီး အိမ်ထဲကလူတွေကို ခေါ်တယ်။ ခေါ်ပြီး အသာလေး ဖမ်းခေါ်သွားတယ်။ အကြောင်းအနေနဲ့ကတော့ ကျွန်တော်တို့လည်း ပြန်စဉ်းစားကြည့်တယ်။ သူဟာ တကယ်တော့ ရပ်ကွက်ထဲမှာ ပရဟိတ လုပ်တဲ့ပုံစံမျိုးပဲရှိတယ်။ ကျန်တဲ့ နိုင်ငံရေးနဲ့ ပတ်သက်တဲ့ အကြောင်းအရာ ပုံစံမျိုးတော့ မမြင်မိဘူး။”

မြင်းခြံဒေသခံ ၁၃ ယောက်ထက်မနည်း ဘာကြောင့် အဖမ်းခံရသလဲဆိုတာ လောလောဆယ် အတိအကျ မသိရသေးပါဘူး။ မြင်းခြံနဲ့ ၇ မိုင်လောက်ဝေးတဲ့ တလုပ်မြို့ ကျေးရွာမှာတော့ စစ်ကောင်စီနဲ့ ဒေသခံကာကွယ်ရေးအဖွဲ့တွေ မေလထဲမှာ အပြန်အလှန်တိုက်ခိုက်မှုတွေ ဖြစ်ခဲ့ဖူးပါတယ်။

မြင်းခြံမြို့အထွက် က လယ်သစ်ကျေးရွာမှာလည်း နေအိမ် တချို့ကို စစ်ကောင်စီတပ်တွေက ၀င်ရောက် ရှာဖွေပြီး အိမ်ထဲက ပစ္စည်းတွေကို ဖျက်စီးသွားတယ်လို့ ကာယံကံရှင်က အခုလိုပြောပါတယ်။

“မနေ့ညက ၁၀ နာရီလောက်ခင်ဗျ။ အိမ်ခြေ ၁ ထောင်ကျော်လောက်ရှိတယ်။ အကုန်မီးဖြတ်ပြီးတော့ ၀င်ပြီးတော့ ကျွန်တော့်အိမ်ကို ၈ နာရီလောက် မီးသတ်ပြီးတော့ ၁၀ နာရီ ကျွန်တော့်အိမ်၀င်ပြီးတော့ လိုချင်တဲ့ ပစ္စည်းတွေ အကုန်ယူတာပဲ။ အိမ်တွင်းပစ္စည်းတွေ အကုန်ဖျက်ဆီးသွားတယ်လေ။ ရေခဲသေတ္တာတွေတို့ TV တွေတို့ အဲယားကွန်းတွေအကုန် ဘာမှမကျန်တော့ဘူး။ မှန်ဘီဒိုတွေ ကောင်တာတွေ စျေးဆိုင်ကောင်တာတွေ အကုန်ဖျက်ဆီးပြီး လိုချင်တဲ့ပစ္စည်းတွေ အကုန်ယူသွားတယ်။”

စစ်တပ်က ဝင်ရောက်ရှာဖွေခဲ့တဲ့ အိမ်တခုရဲ့ အိမ်ရှင်တွေဟာ NLD ပါတီဝင်တွေဖြစ်ကြပါတယ်။ အုပ်ချုပ်ရေးမှူးဟောင်းရဲ့ နေအိမ်ကိုလည်း ဝင်ရောက်ရှာဖွေ ဖျက်စီးလုပ်ခဲ့တယ်လို့ မြို့ခံတွေက ပြောပါတယ်။

Credit