International News

ယနေ့ည ပြုလုပ်မည့်မြန်မာ့အရေး ကုလ တံခါးပိတ်ဆွေးနွေးပွဲ အခြေအနေ…

ကုလသမဂ္ဂ လုံခြုံရေးကောင်စီမှာ မြန်မာ့အရေး တံခါးပိတ်အစည်းအဝေးတခု ဒီကနေ့လုပ်ဖို့ ရှိပါတယ်။
အမေရိကန်နိုင်ငံ၊ အရှေ့ပိုင်းဒေသစံတော်ချိန် မနက် ၁၀ နာရီမှာလုပ်မယ့် လုံခြုံရေးကောင်စီ အစည်းအဝေးမှာ မြန်မာနိုင်ငံအခြေအနေဆိုင်ရာ ဆွေးနွေးဖို့ရှိတယ်ဆိုတာ လုံခြုံရေးကောင်စီ အစည်းအဝေးအစီအစဉ်ကို ထုတ်ပြန်တဲ့ ကုလသမဂ္ဂ အင်တာနက်စာမျက်နှာမှာ တွေ့ရပါတယ်။

ဘယ်လိုအခြေအနေ ဘာအကြောင်းအရာတွေကို ဆွေးနွေးမယ်၊ ဘယ်သူတွေက တင်ပြ ဆွေးနွေးမယ်ဆိုတဲ့ အသေးစိတ်ချက်အလက်တွေကိုတော့ ဖော်ပြမထားပါဘူး။ ဒါပေမယ့်လည်း ကုလသမဂ္ဂဆိုင်ရာ မြန်မာသံအမတ်ကြီးအဖြစ် လက်ရှိအချိန်ထိ တာဝန်ထမ်းဆဲဖြစ်တဲ့ ဦးကျော်မိုးထွန်းတော့ တက်ရောက်ဖွယ်ရှိပါတယ်။

ကြားကာလ အမျိုးသားညီညွတ်ရေးအစိုးရ (NUG) ရဲ့ လူ့အခွင့်အရေးဆိုင်ရာဝန်ကြီး ဦးအောင်မျိုးမင်းကတော့ စစ်ကိုင်းတိုင်း၊ ကနီဒေသမှာ စစ်တပ်က ကျူးလွန်ခဲ့တဲ့ ရာဇဝတ်မှုတွေအကြောင်း အထူးအစီရင်ခံစာကို ဒီကနေ့အစည်းအဝေးအမီ တင်ပြနိုင်ခဲ့တယ်လို့ သူရဲ့ဖေ့စ်ဘုတ်မှာ ရေးထားပါတယ်။

ဇူလိုင်လ ၃၀ ရက်နေ့တုန်းကတော့ ကုလသမဂ္ဂဆိုင်ရာ ဗြိတိန်သံအမတ်ကြီး Barbara Woodward က ကမကထပြုစီစဉ်ပြီး လုံခြုံရေးကောင်စီမှာ မြန်မာ့အရေး အလွတ်သဘောဆွေးနွေးပွဲ လုပ်ခဲ့ပါသေးတယ်။

မြန်မာနိုင်ငံမှာ ဖေဖော်ဝါရီလ ၁ ရက်နေ့ စစ်အာဏာသိမ်းပြီးချိန်ကတည်းကဆိုရင် မြန်မာ့အရေးနဲ့ပတ်သက်လို့ လုံခြုံရေးကောင်စီမှာ အလွတ်သဘောနဲ့ တံခါးပိတ်ဆွေးနွေးပွဲတွေ လုပ်လာနေတာပါ။ ဒါပေမယ့်လည်း လုံခြုံရေးကောင်စီအဖွဲ့ဝင်အားလုံး သဘောတူတဲ့ ဆုံးဖြတ်ချက်တခုခု ထွက်လာတာမရှိသေးဘဲ လုံခြုံရေကောင်စီ အလှည့်ကျဥက္ကဋ္ဌရဲ့ ထုတ်ပြန်ချက်တခု မတ်လ ၁၀ ရက်နေ့က ထွက်ခဲ့တာပဲရှိပါသေးတယ်။

Credit